వైద్యులకే అంతుచిక్కని సమస్య.. ఏఐతో తల్లి ప్రాణాలు కాపాడిన కుమారుడు!

నెలల తరబడి వేధిస్తున్న అనారోగ్య సమస్య.. ఎన్నో వైద్య పరీక్షలు చేసినా తెలియని కారణం.. ప్రాణాలకే ముప్పుగా మారిన పరిస్థితి! చివరకు ఓ కుమారుడు కృత్రిమ మేధ (ఏఐ) సాయంతో తల్లి అనారోగ్యానికి కారణాన్ని గుర్తించాడు. వైద్యులు ఆ నిర్ధారణను పరీక్షించి చికిత్స మార్చడంతో ఆమె ఆరోగ్యం గణనీయంగా మెరుగుపడింది. బ్రిటన్‌కు చెందిన ఎడ్వర్డ్‌ పాట్రిక్‌ తన తల్లి ఆన్‌ పాట్రిక్‌ విషయంలో ఎదురైన అనుభవం ఇది.

నెలలుగా వేధించిన మూర్ఛలు
పార్కిన్సన్‌ వ్యాధితో ఆన్‌ బాధపడుతున్నారు. ఆమెకు ప్రాణాపాయ స్థాయిలో మూర్ఛలు వస్తున్నా.. వాటికి కారణమేంటో వైద్యులు గుర్తించలేకపోయారు. పలు ఆసుపత్రులను సంప్రదించినా, అనేక పరీక్షలు చేసినా స్పష్టమైన సమాధానం దొరకలేదు. తల్లి ఆరోగ్యం రోజురోజుకూ క్షీణిస్తుండటంతో ఎడ్వర్డ్‌ సొంతంగా కారణాన్ని అన్వేషించడం ప్రారంభించాడు.

ఏఐ సూచనతో కీలక మలుపు
ఈ క్రమంలో ఏఐ సాయాన్ని తీసుకున్నాడు. పార్కిన్సన్‌ చికిత్సకు వాడే మందులకు సంబంధించిన విటమిన్‌ బి6 లోపం ఆమె మూర్ఛలకు కారణమై ఉండొచ్చని గుర్తించాడు. ఈ సమాచారాన్ని వైద్య బృందం దృష్టికి తీసుకెళ్లాడు. తదుపరి పరీక్షల్లో వైద్యులు ఆ లోపాన్ని నిర్ధారించారు. వెంటనే చికిత్సలో మార్పులు చేశారు.

చికిత్సతో ఆగిన మూర్ఛలు
విటమిన్‌ బి6ను ఇన్ఫ్యూషన్‌ ద్వారా అందించడంతో మూర్ఛలు ఆగిపోయాయని ఎడ్వర్డ్‌ వెల్లడించాడు. తన తల్లి ప్రాణాపాయ స్థితి నుంచి బయటపడటం నమ్మలేకపోయానని చెప్పాడు. ఆమె బతకడానికి మరికొన్ని గంటలే ఉన్నాయన్నంత తీవ్రమైన పరిస్థితి ఎదురైందని వివరించాడు.

ప్రాణాలకే ముప్పుగా మరో సమస్య
ఆన్‌కు వరుసగా వచ్చిన మూర్ఛల కారణంగా రాబ్డోమయోలిసిస్‌ అనే ప్రమాదకర పరిస్థితి కూడా తలెత్తినట్లు కథనంలో పేర్కొన్నారు. ఈ సమస్యలో కండరాలు దెబ్బతిని, వాటిలోని హానికర పదార్థాలు రక్తంలోకి చేరతాయి. దీంతో మూత్రపిండాలు దెబ్బతినే ప్రమాదం ఉంటుంది. గాయాలు, అధిక శ్రమ, కొన్ని మందులు, ఇతర అనారోగ్య సమస్యలు దీనికి కారణం కావచ్చు.

ఈ ఘటనలో ఏఐ వైద్యులకు ప్రత్యామ్నాయంగా కాకుండా, అరుదైన సమస్యపై దృష్టి సారించేందుకు ఉపయోగపడింది. ఏఐ ఇచ్చిన సమాచారాన్ని వైద్యులు పరీక్షించి నిర్ధారించిన తర్వాతే చికిత్సలో మార్పులు చేశారు. అనారోగ్య సమస్యల విషయంలో స్వయంగా ఏఐ సూచనల ఆధారంగా మందులు మార్చుకోవడం ప్రమాదకరం.